Почетокот на информатичката ера во македонскиот шах – Chessbase во Македонија


Првата верзија на Chessbase беше направена во 1987 година на Атари специјално за Гари Каспаров.  Верзија за PC беше направена следната година. Шаховскиот свет е традиционално многу конзервативен и тешко ги прифаќа промените, a во тоа време малку луѓе ја сфатија важноста на овој историски момент кој ќе го промени шахот засекогаш.
Ова е сторија за почетоците на користењето на програмот Chessbase во Македонија.
Беше почетокот на 1993 година, на точниот ден не се сеќавам. Јас, Орце Данчевски и Марјан Митков отидовме во Софија за да се сретнеме со Интернационалниот мајстор Семко Семков. Тој ги имаше сите шаховски програми и бази што постоеја тогаш. Се договоривме да ни ги продаде и да нè обучи како да ги користиме. Ги купивме Chessbase 4.0 (последната верзија во тој момент) заедно со модулот Fritz 2 и базите на партии. Исто така го купивме и програмот NicBase (денес ретко кој се сеќава на тој конкурентен програм на Chessbase) и неговите бази на партии. Ги научивме главните функции на програмот кои и ден-денес се користат: пребарување на партии, користење на модулот за нивна анализа и правење на дрво. На враќање донесовме со нас многу дискети (5-инчни!) кои ги содржеа базите и програмите.
На мојот домашен 286 (MS-DOS, се разбира) инсталацијата беше спора, но на крај успешна. Заклучив дека е практично да се решам да користам само еден програм. За среќа, решив да го користам Chessbase, а не NicBase (или ChessAssistant кој подоцна се појави, но не ми остави особен впечаток). Таа одлука ми заштеди многу време кога се покажа дека Chessbase е најдобриот од трите бидејќи немаше потреба од преминување и адаптација од еден програм на друг.
На резултатите од иновацијата не требаше многу да се чека. Како и секоја пролет градското првенство на Скопје се организираше во Централниот шаховски дом со вообичаено силен состав. Но и покрај силниот состав исходот на турнирот покажа дека пионерите во користењето на Chessbase беа пред своето време – ние тројцата го поделивме првото место! Историски гледано, тој момент, победата на првенството на Скопје, го означува почетокот на информатичката ера во шахот во Македонија. Победата на турнирот беше очигледен доказ за неоспорните придобивки од користењето на компјутерите при подготовката. Шахот во светот веќе беше тргнал во насока на компјутеризација и иако тоа сеуште беа рани почетоци, благодарение на нас тројца Македонија многу бргу стана една од ретките земји со компјутерски писмени играчи.

Гледано од денешен аспект мене ме радува што успеав да ја согледам перспективата и насоката на развојот на шахот. Имав и доволно смелост да инвестирам во неа. Денес Chessbase 13 е дел од моето секојдневие и не поминува ден, а да не го користам програмот кој за 23 години еволуираше паралелно со шаховската игра која ја промени засекогаш.


Alex Colovic
A professional player, coach and blogger. Grandmaster since 2013.
You may also like
At a Secret Location
Лига 2014
2 Comments
  • May 20,2016 at 7:26 pm

    Kako vcera da bese… hahah kolku disketi bea Pozdrav drugarce…

  • Anonymous
    May 20,2016 at 12:59 pm

    Убави спомени. Фала што ги сподели со нас…

Leave Your Comment

Your Comment*

Your Name*
Your Website