Традиционален брзопотезен турнир на Алкалоид

Како и што најавив во постот за моите следни настапи, денес играв на традиционалниот брзопотезен турнир во организација на шаховскиот клуб Алкалоид.

Се чини дека турнирот со секоја година зема се поголем замав – денес учествуваа 130 шахисти од 6 федерации, од кои 8 велемајстори и 19 играчи со други меѓународни титули. Масовноста е секако за поздравување, тоа само говори дека на Скопје му фалат ваков вид шаховски збиднувања. Вакви настани се ретка прилика шахистите да се најдат на едно место, да разменат мислења, да се дружат и да продискутираат за последните шаховски и нешаховски новости. Но, масовноста од друга страна носи и одредени проблеми кои се огледаа во неефикасноста со парувањето, главно заради конфузијата што се создаваше на последните табли и пријавувањето на резултатите – инвентивните шахисти веќе по второто коло во кулоарите предлагаа алтернативи како играње во помали групи или дури квалификационен турнир за послабите категории.

Победник на турнирот беше гостинот од Бугарија, велемајсторот Кирил Георгиев со импресивни 12/13. Загуби една партија, од Трајко Недев во 5. коло, но потоа до крај ги доби сите партии, вклучувајќи ја и победата против мене во 9. коло (фина техничка партија во ретка варијанта на Нимцо-индијска одбрана). Кога му честитав на победата на турнирот Киро се пожали дека порано играл подобро, дека квалитетот на партиите му бил повисок. Веројатно самиот си знае најдобро, но кога му кажав дека веројатно сега резултатот му е подобар, само се насмеа и не можеше да не се согласи со тој факт!

На делбата на 2 и 3. место се најдоа гостинот од Србија, велемајсторот Миљковиќ и нашиот Недев со 10/13, цели 2 поени зад победникот. Трајко имаше одличен турнир и беше единствениот кој држеше чекор со Георгиев, но неочекувано во претпоследното коло загуби од Младеновиќ (со рејтинг 2188!) и со среќното реми во последното коло против Панчевски успеа да се задржи на врвот.

На 4. место заврши Панчевски, со 9.5/13. Почна несигурно, со 2/3 и 3/5, но потоа како да влезе во ритам и да ја добиеше последната партија против Недев (а беше добиен) резултатот ќе му беше уште подобар.

Јас го поделив 5-13. место, со 9/13 и бев 6. по Бухолц. Сосема солиден резултат, играв како што и треба да се игра цугер, со рака, пробав некои варијанти и главната цел ми беше да добијам малку рутина пред настапот во Рејкјавик. Колку успеав, ќе видиме наскоро!

Комплетната табела можете да ја погледнете тука: http://www.chess-results.com/tnr123762.aspx?lan=1&art=1&rd=13&turdet=YES&flag=30&wi=984

Турнирот несомнено може да се прогласи за успешен, Алкалоид ја продолжува традицијата на организација на турнири и на тој начин го одржува активен шаховскиот живот во Македонија. Љубителите на шахот сигурно би сакале вакви настани да има почесто, но важно е и тоа што кога ги има, тие се квалитетни и добро организирани.

Следен настан на македонската шаховска сцена е Опен Карпош. Турнирот ветува да биде најуспешен до сега, а настап планираат скоро сите македонски шахисти. Да се надеваме дека тој настап ќе биде успешен!

Alex Colovic
A professional player, coach and blogger. Grandmaster since 2013.
You may also like
Reykjavik Open 2015 – Round 1
Tromso Olympiad 2014 – Round 10 – Vikings Defeated!

Leave Your Comment

Your Comment*

Your Name*
Your Website